Теміртау қалалық Мәдениет сарайында «Жұлдыздар» атты балалар шығармашылығы фестивалі өтті. Т.Әубәкіров атындағы гимназия оқушылары арасындағы бұл жыл сайынғы өнер мерекесі биыл Ұлы Отан соғысындағы Жеңістің 80 жылдығына арналды.

Көрермендерге лық толы зал, ал сахнада — болашақтың жұлдыздары. Теміртауда өткен «Жұлдыздар» фестивалі — шынайы өнердің мерекесі. Биылғы шара ерекше рухта өтті: барлық өнер нөмірлері Ұлы Жеңістің 80 жылдығына арналды. Фестивальдің құрметті қонағы — Ұлы Отан соғысының ардагері Николай Семенович Куриленко болды. Гимназия директорының айтуынша, патриотизм мен тарихқа деген құрметті шығармашылық арқылы тәрбиелеу — өте тиімді әдіс.

Сергей Урываев, Т. Әубәкіров атындағы гимназия директоры: «Бүгін біз бірнеше ай бойы дайындалған, жүлделі орындарға ие болған фестиваль лауреаттарын сахнаға шығарамыз. Сонымен қатар сол ұлы күндерді еске аламыз.»

Сахнаға бірінен соң бірі жас өнерпаздар — бірінші сынып оқушыларынан бастап түлектерге дейін шығып жатты. 50-ден астам шығармашылық нөмір: ән, би, көркем сөз оқу. Әр өнер көрсету — ұзақ дайындық пен өзін көрсетуге деген шынайы ниеттің жемісі.

Роман Кудрявцев, 1-сынып оқушысы: «Өте толқулы сәт болды. Біз бұған ұзақ дайындалдық. Нәтиже тамаша болады деп ойлаймын».

Варвара Матюшенко, 1-сынып оқушысы: «Бүгін біз сахнада өнер көрсетеміз. Бәріміз әдеміміз, толқып тұрмыз. Бірақ «Жұлдыздар» фестивалінің өтіп жатқанына өте қуаныштымыз.»

Анфиса Иванцова, 11-сынып оқушысы: «Бұл керемет шара, әр баланың ішкі дамуына серпін береді. Балалар ән айтуды, би билеуді, өлең оқуды үйренеді. Өйткені фестивальде көптеген номинациялар бар».

Фестиваль соңында ең жарқын өнер көрсеткен қатысушылар естелік сыйлықтарға ие болды. Бірақ ең басты сыйлық — балалар сахнадан алған шабыт пен рухани қуат.