Күн жылынған сайын теміртаулықтарды «дезинсекция жүргізіле ме?» деген сұрақ жиі мазалайды. Бұл сұраққа Теміртау қаласының тұрғын үй-коммуналдық шаруашылығы бөлімі жауап берді.

Жылы маусым басталып, тұрғындар арасында масалар мен зиянкестерге қарсы күрес мәселесі жиі көтеріле бастады. Теміртау қаласының тұрғын үй-коммуналдық шаруашылығы бөлімі мәлімдегендей, қалада маусымдық дезинсекция жүргізу жоспарда бар. Өңдеу жұмыстарына негізінен қоғамдық орындар енген. Алайда жұмыстардың басталуы сәл кешігуде.

Арғынғазы Қуанышев, ТҮКШ бөлімі басшысының орынбасары: «Бүгінгі күні бұл жұмыстарға байланысты мемлекеттік сатып алулар өткізілмегендіктен, қайта конкурс жарияланды. Қазіргі уақытта мемлекеттік сатып алу туралы заң аясында процедуралар жүргізілуде».

Дезинсекциялық өңдеу жұмыстары үш кезеңмен жүргізіледі, жалпы көлемі — 5,2 гектар. Өңдеу жүргізілетін аумақтар қатарына: «Шығыс» балалар саябағы, қаланың ескі бөлігіндегі демалыс саябағы, Металлургтер монументі жанындағы балалар алаңы, сондай-ақ бірнеше иесіз жатқан су қоймалары — Чкалов ауылы маңындағы, 55524 әскери бөлімінің жанындағы және 17-шақырым ауданындағы екі су қоймасы кіреді.

ТҮКШ бөлімінде атап өткендей, барлық заңнамалық процедуралар аяқталған соң, мердігер ұйым қысқа мерзімде анықталып, барлық нысандар толық көлемде өңделеді.