5 маусым – Дүниежүзілік қоршаған ортаны қорғау күні. Біздің қаламызда экология тек мамандық емес, шынайы өмірлік миссияға айналған адам бар. Толығырақ — біздің сюжетімізде.

Теміртауда — экология мәселесі ерекше өзекті. Экологиялық сананы қалыптастыруға үлес қосып жүргендердің қатарында ұстаздар мен қоғам белсенділері бар. Елена Петровна Варганова көптеген жылдар бойы мектеп оқушыларына, студенттер мен ересектерге экологиялық тәрбие беріп келеді. Ол өз бастамасына бейжай қарамайтын адамдарды біріктіреді. Елена Петровна — №16 мектептің экология пәнінің мұғалімі ғана емес, сондай-ақ “Отражение” қоғамдық бірлестігінің жетекшісі.

Елена Варганова, №16 мектептің экология пәнінің мұғалімі, “Отражение” ҚБ жетекшісі: «Жан дүниемде мен қоршаған орта мен болашақ үшін өмір сүретін адаммын. Себебі мен балаларды жақсы көремін, олармен жұмыс істегенді ұнатамын, болашақ ұрпақ үшін тірі, гүлденген планета құруға талпынамын. Бүгінде менің кәсіби білімім мен хоббиім үйлескен, сондықтан мен жұмысымды қуанышпен атқарамын. Теміртау қаласы мен Қарағанды облысының мұғалімдерін, мектеп, колледж, университет оқушыларын біріктіремін».

“Отражение” қоғамдық бірлестігі балаларды оқытумен ғана шектелмей, қоғам және мемлекеттік құрылымдармен тығыз байланыста жұмыс істейді. Елена Петровна атап өткендей, экологиялық мәселелерді шешу әр адамның жеке жауапкершілігінсіз мүмкін емес.

Елена Варганова, №16 мектептің экология пәнінің мұғалімі, “Отражение” ҚБ жетекшісі: «Көпшілік ойлағандай, экологиялық мәселелердің негізгі себебі тек өнеркәсіп кәсіпорындарында деп ойласаңыздар — мен бұған келіспеймін. Барлығы ең алдымен адамдардың жауапкершілігіне байланысты. Адамдардың еңбекке деген адалдығы, қоршаған ортаға қаншалықты зиян келтірмей әрекет ететіні, өз іс-әрекеттері үшін жауапкершілік алуға қаншалықты дайын екендігі — міне, басты мәселе. Жол салу мысалын алсақ, біз 3 метр жол саламыз, бірақ сол жолдың айналасындағы 3 метрді құрылыс қалдықтарымен, қоқыспен ластаймыз. Осылайша қоршаған ортаны бүлдіреміз».

“Таза Қазақстан” республикалық бағдарламасы мен 2024–2029 жылдарға арналған экологиялық мәдениет тұжырымдамасы аясында Елена Петровна мен оның командасы шеберлік сабақтары, оқыту шаралары мен ағартушылық акцияларды ұйымдастырып келеді. Биылғы Дүниежүзілік қоршаған ортаны қорғау күніне орай олар Қарағандыда ауқымды экологиялық шара өткізді.

Елена Варганова, №16 мектептің экология пәнінің мұғалімі, “Отражение” ҚБ жетекшісі: «Біз қоқысты сұрыптап тастау, қалдықтарды қайта өңдеу, қауіпсіз орама пайдалану, энергия тиімділігі мен суды үнемдеу сияқты дағдыларды меңгеруіміз керек. Біз өмірімізді өзгерткенде, қоршаған ортаға тигізетін кері әсерімізді азайту жолдарын түсіне бастағанда, жауапкершілігіміз артады, ал табиғат — сау бола түседі. Табиғат берген сұлулықты сақтап, келер ұрпаққа жеткізу үшін адам бола білейік».

Экологиялық тәрбие — бұл болашаққа салынған инвестиция. Бүгінгі таңда қандай құндылықтарды бойымызға сіңірсек, ертеңгі ұрпақтың денсаулығы мен әл-ауқаты соған байланысты. Ал әзірге Елена Варганова табиғатпен үйлесімде өмір сүруге ұмтылатын жаңа буынды шабыттандыруын жалғастыруда.