Теміртаудың Оң жағалауындағы тұрғындар бірнеше жылдан бері ауызсу тапшылығын бастан өткеріп келеді. Жаз мезгілінде түн ортасында ғана шүмектен әлсіз су ағады, ал күндіз мүлдем тоқтап қалады. Ондаған рет шағым айтылғанымен, мәселе түбегейлі шешімін таппай келеді. «АКВА-трейдинг» ЖШС бұл түйткілді жоюға қауқарсыз. Неге ауызсу — қарапайым қажеттілік — бүгінгі таңда қолжетпес құндылыққа айналды? Бұл туралы тілшілеріміздің арнайы материалында.

Теміртау – Қарағанды облысының өндірістік жүрегі. Алайда Оң жағалау тұрғындары үшін бұл қала өркениетті емес, өткен ғасырдағы шалғай ауылдарды еске салады — жаңбыр суын ыдысқа жинау, құдыққа кезекке тұру, таңғы беті-қолды жуу үшін аз-маз су іздеп әурелену. Бұған себеп – жылдар бойы шешілмей келе жатқан ауызсу мәселесі. Қанша мердігер ауысса да, қанша уәде берілсе де, нақты нәтиже жоқ.

Ирина Васильевна Буряк — Сталеваров көшесінде тұратын белсенді тұрғын. Ол бұл көшеде бүкіл өмірін өткізген. Қазіргі шынайылықты ол былайша сипаттайды:

Ирина Буряк, Оң жағалаудағы Сталеваров көшесінің тұрғыны: «Бізде су мәселесі көптеген жылдар бойы шешілмей келеді. Жаз келісімен, әсіресе Оң жағалаудың жоғарғы бөлігінде мүлдем су болмай қалады. Түнде ғана әлсіз ағынмен ағады. Жаңбыр жауса, соны пайдаланып шомыламыз, кір жуамыз, суды қажет ететін барлық шаруаны сонымен істейміз. Ал күндізгі уақытта су мүлдем болмайды».

Тұрғындардың айтуынша, су жүйесін күтіп-ұстауға жауапты «АКВА-трейдинг» ЖШС-не жолданған көптеген шағымдар жауапсыз қалуда.

Ирина Буряк, Оң жағалаудағы Сталеваров көшесінің тұрғыны: «Біздің өтініштерімізге ешқандай жауап жоқ. Мысалы, бүгін мүлде су жоқ. Кеше жаңбырда ғана қатты қысыммен ақты. Таңертең тұрамыз, су жоқ — жуына алмаймыз, жұмысқа дұрыс дайындала алмаймыз».

Иринаның айтуынша, соңғы екі жылда су құбырын ауыстыру басталғалы бері жағдай одан бетер ушығып кеткен. Жөндеу жұмыстары жағдайды жақсартудың орнына, керісінше, үзік-үзік су беруді көбейткен.

Теміртау қаласы әкімінің тұрғын үй-коммуналдық шаруашылық мәселелері жөніндегі орынбасары Ринат Қыдырбеков мәселенің бар екенін ашық мойындайды. Оның айтуынша, су жүйелерінің басым бөлігі қайта жаңартылған. Бірақ қазіргі басты қиындық – бұл желілерді дұрыс күтіп-ұстай алмау.

Ринат Қыдырбеков, Теміртау қаласы әкімінің орынбасары: «Қазіргі таңда туындап отырған мәселе — инженерлік желілердің қызмет көрсетілуінде. Олар сенімгерлік басқаруға берілген. Қысым жетіспеушілігі сияқты түрлі мәселелер туындауда. Бұл жағдайлардың бәрін біз қарап, түпкі себебін анықтаймыз».

Әкім орынбасары бұл мәселе үшін кім жауап беруі керектігін де ашық атап өтті.

Ринат Қыдырбеков, Теміртау қаласы әкімінің орынбасары: «Жауапты — қызмет көрсететін мекеме. Белгілі бір жұмыстар кезінде — мысалы, суды өшіру немесе қысымның төмендеуі орын алса — «АКВА-трейдинг» жедел әрекет етуі тиіс еді. Олар тұрғындарды сапалы ауызсумен қамтамасыз етуге міндетті. Бұл тек судың құрамына ғана емес, сонымен қатар қысымға да қатысты. Су барлық нормаларға сай болуы тиіс».

Қала әкімінің орынбасары Оң жағалауға өзі келіп, тұрғын үй-коммуналдық шаруашылық қызметкерлерімен бірге судың жоқтығының себебін анықтауға кірісті. Негізінде, бұл мәселе «АКВА-трейдинг» ЖШС тікелей міндетіне жатады. Репортаж түсірілген сәтте 582 жеке үйде мүлдем су болмаған. «АКВА-трейдинг» басшылығы тұрғындармен кездесуге келмеді.

Ирина Буряк, Оң жағалаудағы Сталеваров көшесінің тұрғыны: «Құрылған чат топтарында мәселе үнемі талқыланып жатыр. Бірақ нәтиже — нөл. Біресе мердігерлер кінәлі дейді, біресе тұрғындарды айыптайды. Үнемі біреуді кінәлап шығады. Біз өз міндетімізді орындап, қызметке ақша төлейміз, ал бізді ешкім естімейді. Бізді ешкім тыңдамайды».

«АКВА-трейдинг» жұмысын тұрғындар тарапынан сын көп. Бірақ халық бұл жерде қарапайым жұмысшыларды емес, компанияның басшылығын кінәлайды. Неліктен осы мәселені компания өзі реттемей, әкім орынбасары жеке араласуға мәжбүр болып отыр? Бұл сұрақ біздің редакция үшін де ашық күйінде қалды.

Біздің редакция 2025 жылғы 27 мамырда «АКВА-трейдинг» компаниясына ресми сауал жолдаған болатын. Алайда, бүгінгі күнге дейін ресми жауап алынбады.