Тозығы жеткен Қарағанды-Теміртау су құбырын ауыстыру жұмыстары биыл да жалғасын тапты. Қазан айының соңына дейін мердігер 7 шақырым жаңа құбырды жалғамақ.

Теміртаулықтардың басым бөлігін ауыз сумен қамтамасыз етіп отырған Қарағанды-Теміртау су құбыры ескірген. Әбден тозығы жеткен құбырдың 5 шақырымын қала әкімдігі өткен жылдың соңында ауыстырған еді. Бүгінде қалған бөлігінде жұмыстар жалғасып жатыр.

Ораз Тәуірбеков, Теміртау қаласының әкімі: «Байқасаңыздар, жасыл түспен боялған өткен жылы ауысқан құбырлар. Осы жұмыстар арқылы ауыз сумен қамтамасыз ету мәселесін тұрақтандырдық. Қазіргі таңда қалаға келетін ауыз су сағатына 400 текше метр. Осы жұмыс арқылы бұл көлемді 100-150 метрге көбейтетін боламыз».

Жалпы жоспардағы 7 шақырым су құбыры 7 алаңға бөлінген. Мердігерлік мекеме теміртаулықтарды қайта-қайта ауыз сусыз қалдырмау үшін, жұмыстарды толық аяқтап, сосын ғана құбырларды жалғамақ.

Ануар Толендин, «RECON LTD» ЖШС басшысы: «Біз ең тозған әрі ең мәселесі көп аумақтан бастадық. Жаңбырлы күндер басталса бұл жер батпаққа айналады. Сондықтан бұл жерді жылдам аяқтау керек. Ұзындығы 1000-метрге жуық. Бізге тағы 700 метр құбыр әкелінді. Құбырларды бір-біріне жалғап, сонымен бірге жер қазып жатырмыз».

Жұмыстар қазан айының соңына дейін тапсырылуы керек. Мердігерлік мекеме белгіленген уақытқа дейін жұмыстарды аяқтайтындарына сендіріп отыр. Айта кетейік, аталмыш жұмыстарға 75 млн теңге бөлініп отыр.